Die Feestyd is ’n tyd vir familie, kos, feesvieringe en natuurlik tradisies. Van die versiering van bome tot samesyn om die etenstafel — elke kultuur het sy eie unieke manier om hierdie spesiale tyd van die jaar te vier. Een tradisie wat baie lande verenig, is die liefde vir boeke en lees, en daar is ’n paar fassinerende boekgebruike gedurende die feestyd regoor die wêreld:
Jólabókaflóð (die “Kersboekvloed”)
In Ysland gee gesinne vir mekaar op Oukersaand boeke en spandeer dan die res van die aand om dit te lees. Hierdie tradisie gaan dikwels gepaard met gesellige aktiwiteite soos om warmsjokolade en lekkernye te geniet. Ander verwante tradisies sluit in die vertel van tradisionele stories of hardop lees vir mekaar.
Fika-Tradisie (Bake and Books)
In Swede is die feestyd sinoniem met fika — ’n Sweedse term vir “koffiebreek,” wat ook verwys na ’n gesellige gebruik van koffie, gebak en goeie gesprekke. Tydens die Kersseisoen kombineer gesinne dikwels hul fika-oomblikke met saamlees. Prenteboeke, feestelike romans en selfs poësie word gedeel terwyl gesinne ’n blaaskans neem vanuit hul besige vakansievoorbereidings en -skedules. Swede het ook ’n tradisie om boeke as Kersgeskenke te gee, veral aan kinders. Baie van hierdie boeke het ’n feestyd-tema — van die geliefde Pippie Langkous-verhale tot meer onlangse werke. Fika en lees is die perfekte kombinasie van ontspanning en feesvreugde gedurende die seisoen (en ons hier by KoueKoffieBoeke kan aan niks meer perfek dink nie – behalwe dat die koffie wárm en nie koud moet wees nie) 😉
La Nochebuena (“Kersaand-verhale”)
In baie Latyns-Amerikaanse lande en Meksiko is Kersaand, of La Nochebuena, ’n tyd vir familiebyeenkomste, feestelike etes en stories. Een besondere tradisie wat steeds voortleef is die lees van The Night of Las Posadas, ’n tradisionele verhaal wat vertel van Maria en Josef se soektog na ’n plek om in Betlehem te bly. Hierdie verhaal word dikwels hardop gelees tydens die Kersaandvieringe en gaan gepaard met liedere, gebede en soms selfs dramatiese opvoerings. Benewens godsdienstige verhale, geniet baie gesinne dit ook om gedurende die feestyd boeke te lees of as geskenke te gee — veral dié met Kersfees-temas of volksverhale. Kinders ontvang dikwels boeke as geskenke, en slaaptydstories word ’n belangrike deel van die feestelike ritueel.
Gaan loer gerus na die
Kersfeesstories wat ons hierdie seisoen beskikbaar het en oorweeg dit om so ’n tradisie in julle huis te begin!
Lees selfs elke jaar dieselfde spesiale storie(s) en skryf elke kind se naam en waarvoor hulle die spesifieke jaar voor dankbaar was voor- of agterin die boek! So kan hulle eendag terugkyk na al die spesiale Kersfeeste en oomblikke en die boek aan hul eie kinders oordra!
