Beskrywing
AGTERGROND
Vir twee dekades reeds swaai Lillie die heksie haar towerstaffie oor kinderboekrakke dwarsoor die wêreld. Met totale wêreldwye verkope van meer as 20 miljoen eksemplare en vertalings in 40 tale is geen towerformule nodig om te voorspel dat sy ook Afrikaanse harte gaan verower nie! Dié selfleesboekies is gemik op agtjariges en ouer, maar is perfek vir voorlees ook.
Die bekoorlike Lillie, wat saam met haar ma en boetie Leon woon, is ’n doodgewone dogtertjie … of so dínk sy, tot sy op ’n dag ’n towerboek langs haar bed ontdek. Maar niemand is veronderstel om van haar toordery te weet nie – want towerkunsies is nie kinderspeletjies nie!
Lillie besoek ’n museumuitstalling van die ou Egipte waartydens die museumopvoedkundige ’n baie raaiselagtige storie van ’n mummie vertel. Dadelik is al die skoolkinders nuuskierig en elkeen wil probeer om die raaisel van die mummie op te los … en natuurlik laat Lillie die saak nie daar nie. Met behulp van ‘n heksesprong toor sy haarself soontoe en beland in die gang van ’n piramide, vasberade om die raaisel self op te los. Dis donker, spookagtig, en Lillie is nie so seker of sy die regte ding gedoen het nie. En dan hoor sy ook nog skielik voetstappe agter haar …!
OOR DIE OUTEUR EN ILLUSTREERDER
Die Lillie-boeke word al sedert 1992 deur die Duitse uitgewer Arena Verlag uitgegee. Knister en illustreerder Birgit Rieger het saam aan al meer as 40 titels gewerk, waarvan Lilli the Witch and the Magic Homework (“Lillie die heksie keer die skool op sy kop” – Protea 2013) die eerste is.
OOR DIE VERTALER
Amelia de Vaal het Europese Tale en Joernalistiek studeer en is sedert 2007 by Protea Boekhuis werksaam as redakteur en vertaler van Engelse, Duitse en Nederlandse tekste. Die Afrikaanse vertalings van die klassieke Die lewe en werke van kabouters en Die oproep van die kabouters wat in 2010 verskyn het, tel onder haar gunstelingprojekte. Sy woon tans in Portland, Oregon in die VSA.
LESERSPROFIEL
Voorskool en jeug
Resensies
Daar is tans geen resensies nie.