Doen wat vir jóú werk

Op ‘n dag was Pops op my heup terwyl ek die leë stootwaentjie in die nou winkelgang afstoot.

Natuurlik wil sy nie daarin sit nie, het dit weereens verniet saamgebring. Darem kan ek die swaar babasak daarin sit. (Skoon klere vir ingeval sy ’n glipsie het; nekdoekie vir wanneer sy eet; tandesalf; doeke; melk; water; wet wipes; ’n speelding; eetding; fopspeen; doeksakkie; warm top; doekruil-mat – die ellelange lys gaan aan. Vir myself – debietkaart, karsleutel en selfoon. Dis dit.)

Pops steek heeltyd haar handjie uit om aan alles te vat. So soos ons stap, stamp sy goed van die rakke af. Ek “skies, jammer” al outomaties vir wie ook al naby staan en tel op, probeer dan weer aanbeweeg. En dis nou ook nie asof die stootwaentjie dit makliker maak nie. Ek loop kort-kort in iets vas wat uitstaan en dan moet ek weer maneuver om óm dit te kom. Intussen hou ek heeltyd ’n oog op die babasak. Bang dit word gesteel.

Ek is nog nie halfpad nie toe Pops onrustig word.

Iets om aan te kou. Dit sal help.

Ek sit Pops vinnig neer en begin soek na die kosblik. Ek loer na haar toe ek hoor hoe sy neul, praat met haar terwyl ek soek: “Mamma kry gou vir jou iets om te eet. Hou net aan. Toema-toema.” Ek ruk goed uit en gooi dit alles los onderin die waentjie. Pops se stem word harder. Ek begin, sonder om te dink, so gewoond daaraan, “Eendjie, eendjie stap in ’n ry” sing. Die groot oomblik kom en ek kwaak soos ’n eend. Pops lag kliphard. Dankie tog.

Die hele sak is nou al uitgegooi. Ek het duidelik die kosblik by die huis vergeet. Of het ek dit ooit vanoggend ingepak?

Dan sien ek ’n halwe beskuitjie onderin die sak – seker laas week s’n. Verligting! Ek gryp dit en draai om om dit vir Pops te gee. Sien sy gag bietjie. Druk my vinger in haar keel – haal ’n klein haarrekkie uit. Pak die res terug in die botteltjie wat ek geen idee het hoe sy oopgekry het nie, sit dit terug op die rak.

Sy is tevrede met die week oue halwe beskuitjie. Ek sal moet vinnig maak. Dit gaan nie lank hou nie.

By die formulemelk-afdeling hoor ek ’n vaagweg bekende stem.

Sy groet my, baba in ’n sling voor op haar bors – vas aan die slaap. (Weet nie hoe ander ma’s dit regkry nie. Pops wil kan beweeg.)

’n Vriendin van ’n vriendin. Al by kinderpartytjies raakgeloop.

Sy groet, vra hoe dit gaan. (Asof ek haar daar en dan gaan verveel met my kwellinge, so natuurlik sê ek net “goed”.)

Dan kyk sy meningsvol na die beskuitjie in Pops se hand.

“Is dit ’n kóékie?” Grootoë.

“Tennisbeskuitjie, ja.”

“Hoe oud is sy nou weer?”

“10 maande.” Dan, om myself beter te laat lyk, want ek weet wat kom: “En ’n half. 10 en ’n half maande.”

“Sjoe!” gemaak vriendelik. “Ek haal my hoed af vir jou! Myne is amper ’n jaar en sy het nog nóóit-óóit suiker geproe nie. Ek doen nog nie so goed met dit nie.” Laggie. “Jy doen fantasties!”

Ek forseer ’n glimlag. “Elk geval, ek het net gou kom formule kry, moet wikkel.”

“Formule? Borsvoed jy dan nie?”

Hoekom voel ek ek moet verduidelik? “Ek het vir 9 maande geborsvoed, toe speen sy haarself. Nou doen ek maar die formule-ding.”

“En jy’s so rustig daaroor? Ek gaan beslis tot tenminste 1 jaar borsvoed. Hulle sê mos dis maar die beste.” Groot glimlag. “Maar moenie jou bekommer nie, ek’s seker sy sal niks oorkom nie!”

Die aand sit en kyk ek hoe Pops eet. Broccoli, blomkool, murgpampoentjies … En ek is vies vir myself omdat VriendinSeVriendin dit reggekry het om my te ontstel.

Normaal kraam vs keisersnit; borsvoed vs formulemelk; sleep training vs nie sleep training; co-sleeping vs nie co-sleeping; suiker op 1 jaar (wat terloops 12 maande is en dus net 1 en ’n halwe maand later as 10 en ’n half maande) vs suiker op 10 maande … Wat maak dit saak? Elkeen moet tog doen wat vir haar en haar kind die beste werk. Solank jou kind geliefd voel, veilig en gevoed is en almal darem ’n mate van slaap inkry – wat is dan die probleem?

Ek salueer elke ma daarbuite – of jou kind nou al van geboorte af in haar eie kamer slaap of nog op 3 tussen jou en jou man, of jy nou skorsie in jou kind se keel afforseer of haar ’n koekie gee waaraan sy gretig peusel – welgedaan! Dis nie maklik om ’n ma te wees nie. Doen wat vir jóú werk.

Carla Lang

#kouekoffiema

www.kouekoffiema.co.za (Facebook)

https://instagram.com/kouekoffiema (Instagram)

https://www.youtube.com/channel/UC3ftXwIJ8NCH4r_pUGFWBxA (YouTube)