Wannie van die woonstel

Beskrywing

AGTERGROND

Wannie woon alleen in ʼn klein kamertjie op die boonste verdieping van ’n gebou. Hy maak hier vriende met Zaza, die kokkerot, en Dollie, die vriendelike duif wat wéét wanneer om haar ding te doen. Kort voor lank moet Wannie sy dierevriende uit die moeilikheid help. Met sy rooi insleeplorretjie, en saam met Agie (die sindelike meisie wat net pienk dra) en die Stampertjies (ses broertjies met die vreeslikste kapsels), beleef hy groot avonture. Maar kan ʼn klomp kinders regtig ʼn park, en die diere wat in die park woon, red wanneer die grootmense daar wil bou?

Wannie van die woonstel (Pluk van de Petteflet in Nederlands) het in 1971 vir die eerste keer verskyn en word beskou as een van die groot gunsteling Nederlandse kinderboeke van alle tye. Sedertdien is dit in verskeie tale vertaal, o.a. Duits, Noorweegs, Spaans, Russies en Bulgaars. In 2002 is dit in ʼn Nederlandse radiodrama omskep en die fliek, Tow truck Pluck (2004), het in 2005 platinumstatus bereik en is gelys as een van die top tien flieks wat tussen 1995 en 2005 in Nederland verskyn het. Pluk het in 1999 sy eie seël gekry.

OOR DIE OUTEUR 

Annie M.G. Scmidt is in 1911 in Kapelle, Nederland, gebore. Sy het eers in ’n biblioteek gewerk en daarna vir Het Parool, ’n Amsterdamse koerant. Haar kinderboeke is wêreldwyd bekend. In 1988 het sy die hoogste internasionale toekenning vir kinderboekskrywers, die Hans Christian Andersenprys, gekry. Die beroemde Sweedse skryfster Astrid Lindgren het dit aan haar oorhandig. Annie M.G. Schmidt het op 21 Mei 1995, die nag ná haar vier-en-tagtigste verjaardag, gesterf.

LESERSPROFIEL

3-12 jaar